ފޮނުވާ ފޮޓޯ ނުޖެހި ދަނީ ކީއްވެ. އެންމެ ގިނައިން ދިމާވާ ހަތަރު ސަބަބު.
ޑެސްކަށް ދުވާލަކު ގިނަ ފޮޓޯ ލިބެއެވެ. ނަމަވެސް ޖެހެނީ މަދު ފޮޓޯއެކެވެ. ސަބަބުތައް ބުނެލަން ޖެހެއެވެ.
ފުރަތަމަ ސަބަބަކީ ސައިޒެވެ. ވަޓްސްއެޕުން ފޮނުވާ ފޮޓޯ ކުޑަކޮށްލައެވެ. ނޫހުގައި ޖަހާއިރު ސާފުކޮށް ނުފެނެއެވެ. ފޮނުއްވާއިރު، ފައިލެއްގެ ގޮތުގައި ފޮނުއްވުމަށް އެދެމެވެ.
ދެވަނަ ސަބަބަކީ ހުއްދައެވެ. އެހެން ފަރާތެއްގެ ފޮޓޯއެއް ނަމަ، ފޮޓޯ ނެގި ފަރާތުގެ ހުއްދަ ބޭނުންވެއެވެ. ފޮނުއްވާއިރު، ފޮޓޯ ނެގީ ކާކުކަން ލިޔުއްވާށެވެ. ނަން ޖަހާނަމެވެ.
ތިންވަނަ ސަބަބަކީ ކުޑަކުދިންނެވެ. ސާދަ އަހަރުން ދަށުގެ ކުއްޖެއްގެ ފޮޓޯއެއް ޖަހަނީ ބެލެނިވެރިޔާގެ ހުއްދައާއެކުގައެވެ. ހުއްދަ ނެތް ނަމަ، ކިތަންމެ ރީތި ފޮޓޯއެއް ކަމުގައި ވިޔަސް ނުޖަހަމެވެ.
ހަތަރުވަނަ ސަބަބަކީ މަޢުލޫމާތެވެ. ފޮޓޯއާއެކު، އެއީ ކޮން މެޗެއްކަމާއި، ކޮން ދުވަހެއްކަމާއި، ފެންނަ ކުޅުންތެރިންގެ ނަން ލިޔުއްވާށެވެ. ނަން ނޭނގޭ ފޮޓޯއެއް ޖެހުމަކީ ނަން ކުށްކޮށް ޖެހުމުގެ ފުރުޞަތެކެވެ.
މި ހަތަރު ކަން ހަމަވެއްޖެ ނަމަ، ފޮޓޯ ޖެހުމުގެ ފުރުޞަތު ބޮޑެވެ. އަދި ނުޖެހުނަސް، ޖަވާބެއް ދޭނަމެވެ.
