ތިން މީހުންގެ އޮފީހަކާއި، ތިރީސް އެއް ރަށެއް

ފަރުމަތި ފެށީ ރަށްރަށުގެ ޚަބަރު މާލޭގެ ނޫސްތަކުން ނުލިޔެވޭތީއެވެ. ބޮޑު ކަމެއް ހިނގައިގެން ނޫނީ އުތުރުގެ ރަށެއްގެ ނަން ނޫހެއްގައި ނުފެނެއެވެ. އެހެންނަމަވެސް ރަށެއްގައި އުޅޭ މީހަކަށް، ފެރީގެ ގަޑިއެއް ބަދަލުވުމަކީ ވެސް ބޮޑު ޚަބަރެކެވެ.

މިހާރު އުތުރުގެ ހަތަރު އަތޮޅުގެ ތިރީސް އެއް ރަށުން ލިޔުން ފޮނުވައިދޭ ފަރާތްތަކެއް ތިބެއެވެ. ގިނައީ ޓީޗަރުންނާއި، ކައުންސިލްގެ މަސައްކަތުގައި އުޅޭ ފަރާތްތަކާއި، ރަށުގެ ޒުވާނުންނެވެ. އެ ފަރާތްތަކުން ފޮނުވާ ކޮންމެ ލިޔުމެއް އޮފީހުން ކިޔައި، ގުޅައި ކަށަވަރުކުރުމަށް ފަހު ނޫނީ ނުޖަހަމެވެ.

ކަށަވަރުކުރުމަކީ ރަށެއްގައި ފަސޭހަ ކަމެއް ނޫނެވެ. ރަށަކީ ކުޑަ ތަނެކެވެ. ކަމެއް ލިޔުމުން، އެކަން ލިޔުނީ ކާކުކަން ރަށުތެރޭގައި އެނގުމަކީ ވެދާނެ ކަމެކެވެ. އެހެންކަމުން ރަށުން ލިޔުން ފޮނުވާ ފަރާތުގެ ނަން ހާމައެއް ނުކުރަމެވެ. ލިޔުމުގައި ޖަހަނީ އޮފީހުގެ ނޫސްވެރިޔާގެ ނަމެވެ.

ނޫސް ނެރެނީ ކޮންމެ ބުރާސްފައްޗަކުއެވެ. ޗާޕުކުރާ ކޮޕީތައް ކުޅުދުއްފުށީގެ ފިހާރަތަކަށާއި، ބޯޓުތަކުގައި ރަށްރަށަށް ފޮނުވަމެވެ. މި ވެބްސައިޓުގައި ހުންނަ ލިޔުންތައް ކިޔުމަށް ފައިސާއެއް ދައްކާކަށް ނުޖެހޭނެއެވެ. ޗާޕުކުރާ ކޮޕީގެ އަގު ނަގަނީ ކަރުދާހާއި ފޮނުވުމުގެ ޚަރަދަށެވެ.