ކައުންސިލްގެ ބަޖެޓަކީ ރަށުގެ ފައިސާއެވެ. ބަލާލަން ޖެހޭ ހަތަރު ބައެއް.
ކޮންމެ އަހަރަކު ކައުންސިލުން ބަޖެޓެއް ފާސްކުރެއެވެ. އެ ބަޖެޓަކީ ރަށުގެ ފައިސާއެވެ. ނަމަވެސް ގިނަ ރަށްރަށުގައި، އެ ލިޔުން ކިޔަނީ ވަރަށް މަދު ބައެކެވެ.
ފުރަތަމަ ބަލަންވީ އާމްދަނީގެ ބަޔެވެ. ކައުންސިލަށް ލިބޭ ފައިސާ އަންނަނީ ދެ ތަނަކުންނެވެ. ދައުލަތުން ދޭ ފައިސާއާއި، ރަށުން އަމިއްލައަށް ހޯދާ ފައިސާއެވެ. ބިމުގެ ކުއްޔާއި، ބަނދަރުގެ ފީ އާއި، ހޯލުގެ ކުލި ފަދަ ތަކެއްޗެވެ. ރަށުން ހޯދާ ފައިސާ ދަށްވަމުން ދާ ނަމަ، ސަބަބު އެހުން ރަނގަޅެވެ.
ދެވަނަ ބަލަންވީ މުސާރައަށް ދާ ޢަދަދެވެ. ބަޖެޓުގެ ބޮޑު ބައެއް މުސާރައަށް ދާ ނަމަ، މަޝްރޫޢުތަކަށް ޖާގަ ކުޑަވާނެއެވެ.
ތިންވަނަ ބަލަންވީ މަޝްރޫޢުތަކުގެ ލިސްޓެވެ. ކޮންމެ މަޝްރޫޢަކަށް ކަނޑައަޅާފައިވާ ޢަދަދު ބަލާށެވެ. ޢަދަދު ކުޑަ ނަމަ، އެ އަހަރު ފެށެނީ ތައްޔާރީ މަސައްކަތް އެކަނި ކަމަށް ވުން ގާތެވެ.
ހަތަރުވަނަ ބަލަންވީ މިދިޔަ އަހަރުގެ ބަޖެޓެވެ. މިދިޔަ އަހަރު ކަނޑައެޅި ޢަދަދާއި، ޙަޤީޤަތުގައި ހޭދަވި ޢަދަދު އަޅާކިޔާށެވެ. ބޮޑު ފަރަޤެއް ހުރި ނަމަ، އެ ފަރަޤުގެ ސަބަބު ކައުންސިލުން ސާފުކޮށްދޭން ޖެހެއެވެ.
ބަޖެޓު ފާސްކުރާ ޖަލްސާއަށް ރައްޔިތުންނަށް ވަދެވެއެވެ. ވަދެވޭކަން ނޭނގޭ މީހުން ގިނައެވެ.
